သင်သိရဲ့လား (၁)


"ကမ္ဘာ့အထီးကျန်ဆုံး ATM စက်"  


ယနေ့ခေတ်တွင် ATM စက်လို့ခေါ်တဲ့ အလိုအလျောက် ငွေထုတ်ယူလို့ရတဲ့ စက်များကို ကမ္ဘာအနှံ့ ကျယ်ကျယ် ပြန့်ပြန့် အသုံးပြုနေကြပြီ ဖြစ်ပါတယ်။ ကျွန်တော်တို့ နိုင်ငံမှာလည်း ATM စက်များကို အများအပြား အသုံးပြုနေတာ တွေ့ရပါတယ်။ ကိုယ်လိုချင်တဲ့အချိန်မှာ ငွေသား ချက်ချင်း ထုတ်နိုင်တဲ့ ATM စက် (လိုင်း မကျရင်ပေါ့ဗျာ :P) ကို လူတိုင်း က နှစ်ခြိုက်သဘောကျစွာ သုံးစွဲလျက် ရှိပါတယ်။

ATM စက်တွေကို စူပါမားကတ် ကြီးတွေ၊ ရှော့ပင်းမော်လ်တွေ၊ ဈေး၊ ကျောင်း၊ ဆေးရုံ၊ ရုပ်ရှင်ရုံစသဖြင့် လူအများအပြား သွားလာလှုပ်ရှားလေ့ရှိတဲ့ နေရာမျိုးမှာ ထားရှိကြပါတယ်။ ဒါပေမယ့် ကမ္ဘာ့တောင်ဝင်ရိုးစွန်း ဖြစ်တဲ့ အန္တာတိကတိုက်မှာ ATM စက် တစ်ခု ရှိတယ်လို့ တစ်စုံတစ်ယောက်က ပြောခဲ့ရင် သင် အံ့အားသင့် သွားပါလိမ့်မယ်။ ရေခဲမှတ်အောက် ကျဆင်းနေတဲ့ အပူချိန်၊ နှစ်တစ်နှစ်ရဲ့ လအတော်များများမှာ နေရောင်ခြည် မရရှိတဲ့ နေရာမှာ ATM စက်တစ်ခု တကယ်ရှိပါတယ်။

အန္တာတိက တိုက်ရဲ့ အကြီးမားဆုံး သိပ္ပံသုတေသန စခန်းတစ်ခုဖြစ်တဲ့ McMurdo စခန်းမှာ ATM စက်တစ်ခုကို Wells Fargo ဘဏ်လုပ်ငန်းအဖွဲ့က ၁၉၉၈ ခုနှစ်ကတည်းက စတင်တပ်ဆင်ခဲ့ပြီး ဖြစ်ပါတယ်။ ရာသီဥတု အခြေအနေပေါ်မူတည်ပြီး McMurdo သိပ္ပံစခန်းမှာ လူဦးရေ ၂၅၀ မှ ၁၀၀၀ အထိ နေထိုင်လျက် ရှိပါတယ်။ တခြား သေးငယ်သော လူ့အဖွဲ့အစည်းတွေလိုပဲ အဲဒီ သိပ္ပံစခန်းမှာလည်း ကုန်စည်စီးဆင်းမှု သဘောတရားတွေ ရှိပါတယ်။ ထုတ်ကုန်၊ သွင်းကုန်သဘော တရားတွေ မရှိတဲ့ ဒေသဖြစ်ပေမယ့်လည်း ကော်ဖီဆိုင်တွေ၊ လူသုံးကုန် စတိုးတွေ၊ ဘားတွေနဲ့ စာတိုက်တစ်ခု ရှိတဲ့ အဲဒီ သိပ္ပံစခန်းမှာ ငွေကြေးအသုံးပြုမှုကတော့ လိုအပ်ပါတယ်။ တချို့ဆိုင်တွေကတော့ ခရက်ဒစ်ကတ် အသုံးပြုနိုင်ပေမယ့် ငွေသား သီးသန့်သာ လက်ခံတဲ့ဆိုင်တွေလည်း ရှိပါတယ်။ ထို့အတွက်ကြောင့် ကမ္ဘာ့အထီးကျန်ဆုံး ATM စက်လို့ တင်စားခေါ်နိုင်တဲ့ ATM စက်ကို တပ်ဆင်ထားခြင်း ဖြစ်ပါတယ်။

အန္တာတိက ဒေသရဲ့ ဆိုးဝါးတဲ့ ရာသီဥတုအခြေအနေကြောင့် ပုံမှန် ပျံသန်းမှုတွေ မလုပ်နိုင်တဲ့အခါ တပ်ဆင်ထားတဲ့ ATM စက် ကို ပြုပြင်ထိန်းသိမ်းဖို့အတွက် Wells Fargo ကုမ္ပဏီက အစီအစဉ်တွေ ပြုလုပ်ထားပါတယ်။ လွယ်ကူတဲ့ အသေးစား ပြင်ဆင်မှုများကို ပြုလုပ်ဖို့ သိပ္ပံစခန်းမှာ ရှိတဲ့ ဝန်ထမ်းများကို ကုမ္ပဏီက သင်တန်းများ ပေးထားပါတယ်။ အထူးသဖြင့် အရန် ATM စက်တစ်ခု တပ်ဆင်ထားပြီး ပင်မ ATM စက်အတွက် လိုအပ်သော စက်ပစ္စည်း အစိတ်အပိုင်းများကို အဆိုပါ အရန်စက်မှ ရယူစေပါတယ်။ ၂ နှစ်ကြာတိုင်း စက်များ ကို ပြင်ဆင်ထိန်းသိမ်းမှု ပြုလုပ်ပြီး နောက်ဆုံးပေါ် နည်းပညာတွေနဲ့ ကိုက်ညီအောင် အဆင့်မြှင့်တင် ပေးပါတယ်။ ယင်း ATM စက်များကို သွားရောက် ပြုပြင်မည့်သူများကိုလည်း အန္တာတိက ရာသီဥတုတွင် အလုပ်လုပ်နိုင်သည့် ကိုယ်ကာယကြံ့ခိုင်မှု ရှိ/မရှိ စစ်ဆေးရုံသာမက စိတ်ပညာဆန်းစစ်မှု စာမေးပွဲ များ စစ်ဆေးပြီး အောင်မြင်သူများကိုသာ စေလွှတ်လေ့ ရှိပါတယ်။

McMurdo စခန်းသည် နယူးဇီလန်နိုင်ငံ၏ ပိုင်နက်နယ်မြေအနီးတွင် တည်ရှိသော်လည်း စခန်းရှိ ATM စက်တွင် အမေရိကန်ဒေါ်လာကိုသာ ထုတ်ယူနိုင်ပါတယ်။ ငွေလဲလှယ်လိုသူများအနေဖြင့် စခန်းနှင့် ၂ မိုင်ကွာဝေးသော အခြားသိပ္ပံစခန်းတစ်ခု ဖြစ်တဲ့ Scott Base စခန်းတွင် သွားရောက် လဲလှယ်နိုင်ပါတယ်။ အန္တာတိက ဒေသတွင် တရားဝင်ငွေကြေး မရှိသော်လည်း အန္တာတိက နိုင်ငံခြားငွေလဲလှယ်ရေးရုံးက ငွေကြေး စီးဆင်းမှု လွယ်ကူ အဆင်ပြေစေရန် အမေရိကန်ဒေါ်လာနှင့် တန်ဖိုးတူ အန္တာတိက ငွေစက္ကူအချို့ကို ရိုက်နှိပ်ထုတ်ဝေ အသုံးပြုခဲ့ပါတယ်။ အဆိုပါငွေစက္ကူများကို သတ်မှတ်သက်တမ်းဖြင့်သာ ထုတ်ဝေခဲ့ခြင်း ဖြစ်ပါတယ်။

တစ်စုံတစ်ယောက်က ပြဿနာ ဖြစ်ပေါ်လိုတဲ့ ရည်ရွယ်ချက်နဲ့ စခန်းမှာ ရှိတဲ့ ATM စက်ထဲက ငွေအကုန်လုံးကို ထုတ်ယူ မသွားနိုင်ဘူးလား ဆိုတဲ့ မေးခွန်းမျိုး မေးချင်ကြပါလိမ့်မယ်။ အဲဒီ မေးခွန်းအတွက် အဖြေကိုတော့ ကုမ္ပဏီက တာဝန်ရှိသူ တစ်ဦးက အခုလို ဖြေကြားသွားပါတယ်။ “လုံခြုံရေး အကြောင်းပြချက်များအရ စက်ထဲမှာ ငွေဘယ်လောက် ထည့်ထားတယ်ဆိုတာနဲ့ တခြား အချက်အလက်အချို့ကို ကျွန်တော်တို့ ဘယ်တော့မှ ပြောမှာ မဟုတ်ပါဘူး။ ဥပဒေတစ်ခုခုကို ချိုးဖောက်မလို့ ကြံစည်တဲ့သူတိုင်းကို ကျွန်တော်တို့ သတိပေးသွားမှာ ဖြစ်ပါတယ်။ ပြီးတော့ ATM စက်မှာ ကင်မရာ တစ်လုံး တပ်ဆင်ထားပါတယ်” ဟု ပြောကြားခဲ့ပါတယ်။

ပထမပုံကတော့ ကမ္ဘာ့အထီးကျန်ဆုံး ATM စက်လို့ တင်စားထားတဲ့ အန္တာတိက ဒေသမှာရှိတဲ့ ATM စက်နဲ့ အရန်စက်ရဲ့ ပုံဖြစ်ပြီး ဒုတိယပုံကတော့ အန္တာတိက နိုင်ငံခြား ငွေလဲလှယ်ရေးရုံးက ထုတ်ဝေတဲ့ အန္တာတိက ငွေစက္ကူ ၁၀ ဒေါ်လာတန် (အမေရိကန်ဒေါ်လာ ၁၀ ဒေါ်လာနှင့် ညီမျှသည်) ရဲ့ ပုံဖြစ်ပါတယ်။

Related Posts