“၁၃ဂဏန်းနောက်ကွယ်က လျှို့ဝှက်ချက်များ” [ Special Issue ]


“၁၃ဂဏန်းနောက်ကွယ်က လျှို့ဝှက်ချက်များ” 	

မင်္ဂလာပါ ဝန်ဇင်းစာချစ်သူများခင်ဗျာ … 

ဒီနေ့ကတော့ ပြက္ခဒိန်ထဲက ကမ္ဘာကျော် နေ့ရက်တစ်ခုဖြစ်တဲ့ Friday 13th ကို ကျရောက်လာပြီပဲ ဖြစ်ပါတယ်။ နှစ်တစ်နှစ်မှာ Friday 13th ရက်ဟာ အနည်းဆုံးတစ်ကြိမ်ကနေ အများဆုံး သုံးကြိမ်အထိပဲ ကျရောက်လေ့ရှိပါတယ်။ ဒီနှစ် ၂၀၁၈ ခုနှစ်ကတော့ နှစ်ကြိမ်ကျရောက်တဲ့နှစ်ပေါ့၊ ဧပြီလမှာတစ်ကြိမ်ဖြစ်ခဲ့ပြီး ခုတစ်ကြိမ်ကတော့ ဇူလိုင်လ … 

၁၃ ဂဏန်း - သူဟာ စွမ်းအားကြီးတယ်၊ နက်နဲတယ်၊ လျှို့ဝှက်တယ်၊ ဂမ္ဘီရဆန်တယ်၊ ခြောက်ခြားဖွယ်ကောင်းတယ်၊ တားရော့ရဲ့ ၁၃ ချပ်မြောက်က The Death ( မရဏကားချပ် ) ဖြစ်နေတာကြောင့် ၁၃ ဟာ နတ်ဆိုး၊ သေခြင်းတရားနဲ့ဆိုင်တယ်၊ အမှောင်လောကကို ကိုယ်စားပြုတယ် … စသည်စသည်ဖြင့် ကိန်းဂဏန်းနဲ့ ပတ်သက်ပြီး လေ့လာသူမဟုတ်တဲ့ သာမန်လူတောင် အဆိုပါ ( ၁၃ ) ကိန်းဂဏန်းနဲ့ ပတ်သက်ရင် အစွဲလေးတွေ ရှိတတ်ကြပါတယ်။ အများစုကတော့ ( ၁၃ ) ကို unlucky number အဖြစ် သတ်မှတ်ထားကြတဲ့ ကိစ္စပါပဲ။ ကံဆိုးမှုအပေါင်းရဲ့ မိဖုရားခေါင်ကြီးပေါ့လေ။ 

အိမ်မှာ လှေကား ၁၃ ထစ်မထားဘူး။ ပြတင်းပေါက် ၁၃ ပေါက်မထားဘူး။ အိမ်နံပါတ် ၁၃ ဆိုရင် လက်ရှောင်တယ်၊ မဝယ်ကြဘူး။ နာမည်ကြီး ဟိုတယ်တွေမှာတောင် အခန်းနံပါတ် ၁၃ ဆိုတာမရှိဘူး၊ ကျော်သွားတယ်၊ ရှိခဲ့ရင်လည်း အဲ့ဒီအခန်းကို လူမသုံးဘူး။ ၁၃ ဂဏန်းကျတဲ့ရက်တွေဆိုရင် ပိုဆိုးတယ်၊ အရေးကြီးတဲ့ကိစ္စ ဆောင်ရွက်ဖို့ရှိတယ်ဆိုရင် ရက်ရွှေ့လိုက်တယ်။ ၁၃ ရက်နေ့မှာ မင်္ဂလာမဆောင်ဘူး။ ၁၃ ရက်နေ့မှာ ချစ်သူဖြစ်ခဲ့ကြတယ်ဆိုရင် သူတို့ချစ်သူသက်တမ်းတလျှောက်မှာ ဖြောင့်ဖြူးမှာမဟုတ်ဘူး … စတဲ့ ၁၃ ပေါင်း သောင်းခြောက်ထောင်သော အယူအဆ အစွဲအလမ်းတွေက လူ့အဖွဲ့အစည်းတစ်ခုလုံးမှာ စိမ့်ဝင်ပျံ့နှံ့နေတယ်။ 

စာချစ်သူတို့ကို အနီးဆုံး ဥပမာပြရရင် ရန်ကုန်တိုင်းဝန်ကြီးချုပ် ဦးဖြိုးမင်းသိန်းရဲ့ စီမံကိန်းတစ်ခုဖြစ်တဲ့ YBS ယာဉ်လိုင်းတွေမှာတောင် YBS No.13 ဆိုတာ မရှိဘူး၊ ယာဉ်လိုင်းသစ်တွေ စထွက်ကတည်းက ယာဉ်လိုင်းနံပါတ် ( ၁၃ ) ကို မထည့်ထားတာကို သတိထားမိကြမှာပါ။ 

တစ်ကမ္ဘာလုံးက အာရုံစိုက်နေကြတဲ့ အကြောင်းအရာဖြစ်တဲ့ ထိုင်းနိုင်ငံက လူငယ် ( ၁၃ ) ဦး လှိုဏ်ဂူထဲ ဝင်ရောက်ပျောက်ဆုံးသွားတဲ့ အချိန်ကစလို ယခု ပြန်လည်ရှာတွေ့တဲ့အထိ ပြည်တွင်းပြည်ပ သတင်းတွေမှာ ( ၁၃ ) ဂဏန်းကို ရှောင်ပြီး သူတို့ကို ထိုင်းနိုင်ငံမှ ဘောလုံသမားလူငယ် ( ၁၃ ) ဦးအဖြစ် သုံးနှုန်းတာ မတွေ့မိသလို အများအားဖြင့်တော့ “လှိုဏ်ဂူအတွင်း ပိတ်မိနေသော ကျောင်းသား ၁၂ ဦးနှင့် ၄င်းတို့၏ နည်းပြဆရာ” ၊ “The 12 boys and their football coach” … စသဖြင့် ရေးသားဖော်ပြကြပါတယ်။
 
ဒီတော့ ( ၁၃ ) ဟာ ဘာကြောင့်များ လူအများစု လက်ရှောင်တဲ့ကိန်းဂဏန်း၊ အာရုံစိုက်မိစရာ ကိန်းဂဏန်းတွဲတစ်ခု ဖြစ်နေရတာလဲ။ ကိန်းဂဏန်းပေါင်း မြောက်မြားစွာရှိတဲ့အထဲကမှ ( ၁၃ ) ဂဏန်းက ဘာကြောင့် နာမည်ကြီးနေရတာလဲ။ သင်္ချာသမားပဲဖြစ်ဖြစ်၊ ဂမ္ဘီရသမားပဲဖြစ်ဖြစ်၊ ထူးထူးဆန်းဆန်းတွေ စိတ်ဝင်စားတဲ့သူပဲဖြစ်ဖြစ် … ၁၃ ဂဏန်းနဲ့ ပတ်သက်ပြီး လူတွေအာရုံစိုက်မိတဲ့အကြောင်းအရင်းက ဘာများလဲဆိုတာကို အပျင်းပြေပဲဖြစ်ဖြစ်၊ အတည်ပဲဖြစ်ဖြစ် စဉ်းစားတွေးတောကြည့်သင့်ပါတယ်။ 

13 ဂဏန်းနှင့် ပတ်သက်သည့် ယူဆချက်အထွေထွေ

၁။ Friday 13th အယူအဆရဲ့ မြစ်ဖျားခံရာတစ်ခုကတော့ အနောက်တိုင်း ရှေးရိုးစွဲယုံကြည်မှုက စတာလို့ ဆိုရမှာပါ။ မျက်စိထဲမြင်အောင် ပြရမယ်ဆိုရင်တော့ ကောင်းကင်ဘုံကသိစိတ်ဝိညာဉ်နဲ့ ပေါင်းကူးပြီး ရေးဆွဲခဲ့တယ်လို့ နာမည်ကြီးတဲ့ ကမ္ဘာကျော် ပန်းချီပညာရှင်ကြီး လီယိုနာဒိုဒါဗင်ချီရဲ့ ဂန္ထဝင်လက်ရာ - “နောက်ဆုံးညစာစားပွဲ” ( The Last Supper ) လို့ အမည်ရတဲ့ ပန်းချီကားနဲ့ ခရစ်ယာန်တော်သမိုင်းပါပဲ။  ဒါဗင်ချီရဲ့ ပန်းချီကားထဲမှာ ဖန်ဆင်းရှင်ဘုရားရဲ့ သားတော် ဂျီးဆပ်စ်ကို သာဝက ( ၁၂ ) ဦးက ခြံရံထားတယ်။ ခရစ်တော်ကတော့ ( ၁၃ ) ယောက်မြောက်ပေါ့။ ခရစ်တော် ကားစင်တင်ပြီး ကွပ်မျက်ခြင်းခံရတာကတော့ Friday နေ့ပါပဲ။ [ ဒီအချက်ကနေ ဆင့်ပွားလာတာလားလို့ တွေးစရာအချက်ကတော့ ခုချိန်ထိ အနောက်တိုင်းမှာ ယုံကြည်နေဆဲ အယူအဆတစ်ခုဖြစ်တဲ့၊ ထမင်းဝိုင်းမှာ လူ ၁၃ ယောက် ထမင်းလက်ဆုံစားမိတယ်ဆိုရင် အဲ့ဒီထဲက တစ်ယောက်ကတော့ သေတဲ့အထိ၊ သို့မဟုတ် သေလောက်တဲ့ ဘေးဒုက္ခဆိုး အန္တရာယ်တစ်ခုခုကို ရင်ဆိုင်ရတော့မယ်ဆိုတာပါပဲ။ ]

ကဲ … Firday ကို ချန်ပြီး 13 အကြောင်း ပြောကြရအောင်။

၂။ အနောက်တိုင်းဂမ္ဘီရပညာရှင်တွေကတော့ အဖွဲ့အစည်းဖွဲ့ရင် လူ ၁၃ ဦး အတိအကျနဲ့ ဖွဲ့စည်းတတ်ကြပြီး အစီအရင်ပြုလုပ်တိုင်းမှာ ၁၃ ဂဏန်းနဲ့ ပတ်သက်တာကို ထည့်သွင်းလေ့ရှိပါတယ်။ ဥပမာ - နာမည်ကြီးဖြစ်တဲ့ ၁၃ ရက်၊ သောကြာနေ့ ( 13th Friday ) မှာပြုလုပ်တာ၊ ဖယောင်းတိုင် ၁၃ တိုင်ထွန်းတာ စသဖြင့်ပေါ့။ 

၃။ ကိန်းဂဏန်းဗေဒင် ( Numerology ) မှာတော့ ၁၃ ဂဏန်းဟာ အဓိကအားဖြင့် ၁ နှင့် ၃ ပေါင်းခြင်းက ရလာတဲ့ ၄ ဂဏန်း၊ ၈ ဂဏန်းရဲ့မှာ ၄ ဂဏန်းနှစ်ခုပါဝင်ခြင်းအားဖြင့် ၄ နှင့် ၈ ဂဏန်းတို့ အဆက်အစပ် ရှိရာကစလို့ ၁၃၊ ၄၊ ၈ တို့ဟာ ထူးခြားတဲ့ ကိန်းဂဏန်းအုပ်စုအဖြစ် တည်ရှိနေတယ်။ ဒီဂဏန်းသုံးခုလုံးမှာ လျှို့ဝှက်နက်နဲတဲ့ စွမ်းအင်တွေရှိနေပြီး သူနဲ့ဆိုင်နဲ့ အရာတွေအပေါ် လွှမ်းမိုးမှုအားများတယ်၊ အနုတ်လက္ခဏာဆောင်တဲ့ စွမ်းအင်သက်ရောက်လေ့ရှိတယ်လို့ ဆိုကြတယ်။ ဥပမာ - ( ၈ ) ဂဏန်းသမားတစ်ယောက်ရဲ့ ဘဝတလျှောက် အရေးကြီးတဲ့ဖြစ်ရပ်၊ အလှည့်အပြောင်းတိုင်းမှာ ( ၈ ) ဂဏန်းဟာ စိုးမိုးနေမှာဖြစ်သလို ပေါင်းခြင်း ( ၄ ) ရတဲ့ ( ၁၃ ) ဂဏန်းဟာလည်း ပါဝင်ပတ်သက်မှုနှုန်းများပြားတာကို တွေ့ရမှာဖြစ်တယ်။
 
၎။ ရှေးရိုးအယူအဆတစ်ခုမှာ ပြောပြထားတာကတော့ သင့်ဆီကို လိပ်မူပြီး ပို့လိုက်တဲ့ စာအရေအတွက်က ( ၁၃ ) စောင်ရှိနေပြီဆိုရင် သင့်ဆီမှာ ကျိန်စာတစ်ခုခု သက်ရောက်နေပါပြီတဲ့။ ခုခေတ်မှာ စာတိုက်မှတဆင့် စာပို့ခြင်းအလေ့အထက ခေတ်စားမှုမရှိတော့ဘူးဆိုတော့ ကိုယ့်ရဲ့ ဖုန်း sms box ကို ပြန်ကြည့်ရမှာပေါ့လေ၊ sms စောင်ရေ ၁၃ ခုက တိုက်တိုက်ဆိုင်ဆိုင်ပဲ တစ်ရက်တည်းမှာ ရောက်ရှိနေပြီဆိုရင်တော့ ဟဲဟဲ .. အပျင်းပြေစဉ်းစားစရာလေးပါ။

၅။ နောက်ထပ် စိတ်ဝင်စားဖို့ကောင်းတဲ့တစ်ချက်ကတော့ သမိုင်းမှာ နာမည်ကြီးပုဂ္ဂိုလ်တွေရဲ့ နာမည် စာလုံးအရေအတွက်က ( ၁၃ ) လုံးရှိနေတဲ့ ကိစ္စပါပဲ။ ကောင်းတဲ့ဘက်မှာဖြစ်စေ၊ ဆိုးတဲ့ဘက်မှာဖြစ်စေ နာမည်ကျော်တဲ့ ပုဂ္ဂိုလ်တွေရဲ့ နာမည်စာလုံး အရေအတွက်က ( ၁၃ ) လုံး ဖြစ်နေတတ်ပါတယ်တဲ့။ ဖတ်ဖူးတဲ့ website မှာ ဖော်ပြထားတာတစ်ခုကတော့ နာမည်ဆိုးနဲ့ ကျော်ကြားတဲ့ လူသတ်သမားတွေရဲ့ နာမည်တွေ … Charles Manson, Jack the Ripper, Jeffery Dahmer, Theodore Bundy, Albert De Salvo စသူတွေရဲ့ နာမည်စာလုံး အရေအတွက်တွေက ( ၁၃ ) လုံးဖြစ်နေတာပါ။ ( သူတို့အကြောင်းကို Google မှတဆင့် ဆက်လက်ရှာဖွေနိုင်ပါတယ်။ ) နောက်ထပ် လူသိနည်းတဲ့တစ်ချက်ကတော့ ဂျာမဏီမှာ နာဇီပါတီရဲ့ အာဏာရှင် ဟစ်တလာ - Adolf Hitler ရဲ့ နှစ်ခြင်းမင်္ဂလာမှာ ကင်ပွန်းတပ်ခဲ့တဲ့နာမည်က Adolfus Hitler ပါတဲ့၊ စာလုံးအရေအတွက်ကိုကြည့်လိုက်ပါ … ( ၁၃ ) ပါပဲ။ 

ထပ်မံပြီး အထင်ရှားဆုံး ဥပမာအဖြစ်ပြရမယ်ဆိုရင် လက်ရှိ မြန်မာနိုင်ငံရဲ့ “နိုင်ငံတော်၏ အတိုင်ပင်ခံပုဂ္ဂိုလ်” ဒေါ်အောင်ဆန်းစုကြည် - Aung San Suu Kyi ဟာ စာလုံးအရေအတွက်အားဖြင့် ( ၁၃ ) လုံးရှိနေတဲ့၊ ထူးခြားထင်ရှားသူ ( ၁၃ ) ဂဏန်းသမားတစ်ယောက် ဖြစ်နေတာပါပဲ။

၆။ ၁၃ ဂဏန်းနဲ့ ပတ်သက်ပြီး ရယ်ဖို့လည်းကောင်း၊ သြချလောက်ရတဲ့ အယူသည်းဖြစ်ရပ်တစ်ခုကတော့ Friday the 13th ဖြစ်တဲ့ ၁၃ ရက်၊ သောကြာနေ့ဟာ စီးပွားရေးလုပ်ငန်းတွေအတွက် ဂယက်ရိုက်စရာ နေ့တစ်နေ့ပါတဲ့။ စစ်တမ်းတစ်ခုရဲ့ တင်ပြချက်ကတော့ ၁၃ ရက်၊ သောကြာနေ့တိုင်းမှာ ဘယ်သူမှ အရောင်းအဝယ် မပြုလုပ်ကြလို့ နှစ်စဉ်နှစ်တိုင်း ဘီလျံနဲ့ချီတဲ့ဝင်ငွေတွေ ဆုံးရှုံးရပါတယ်လို့ ဆိုပါတယ်။ 
၇။ ကမ္ဘာပေါ်မှာရှိတဲ့ ကားပြိုင်ပွဲတွေအနက် အကျော်ကြားဆုံးဖြစ်တဲ့ Formula 1 ကားပြိုင်ပွဲမှာရှိတဲ့ ကားနံပါတ်တွေမှာ ၁၃ နံပါတ်ပါတဲ့ ကားမရှိပါဘူးတဲ့။ ကံမကောင်းတဲ့နံပါတ်အဖြစ် ယူဆထားတဲ့အတွက် ဒီနံပါတ်ပါရင်တောင် ပြိုင်ခွင့်မပေးဘူး၊ အခြားနံပါတ်ပါတဲ့ကားနဲ့ ယှဉ်ပြိုင်စေတယ်လို့ သိရပါတယ်။ 

၈။ လူဦးရေ ၁၇ သန်းကနေ ၂၂ သန်းထိပမာဏရှိတဲ့ အမေရိကန်နိုင်ငံက ပြည်သူတွေဟာ ၁၃ ရက်၊ သောကြာနေ့ကို စိုးရိမ်ထိတ်လန့်တတ်ကြပြီး အဲ့ဒီနေ့မှာ ဘာကိုမှမလုပ်ဘဲ အိမ်တွင်းအောင်းနေတတ်တယ်လို့ ဆိုပါတယ်။ 

၉။ အမျိုးသမီးတွေရဲ့ ပုံမှန်ရာသီလာမှုဟာ ယေဘုယျအားဖြင့် တစ်နှစ်မှာ ( ၁၃ ) ကြိမ်ရှိပါတယ်။ ( ရာသီကာလ ၂၈ ရက်သတ်မှတ်မှုအပေါ် အခြေခံပါသည်။ ) ဒီအချက်ဟာ အမျိုးသမီးတွေအနေနဲ့ ( ၁၃ ) ဂဏန်းကို စိတ်ပျက် ကြောက်ရွံ့ကြတဲ့ အချက်တစ်ခုလည်း ဖြစ်ပါတယ်။ 

၁၀။ ၁၃ ဂဏန်းကို ကြောက်တဲ့ရောဂါကို Triskaidekaphobia လို့ခေါ်ပြီး ၁၃ရက်၊ သောကြာနေ့ကို အလွန်အမင်း ထိတ်လန့်တတ်သူတွေကိုတော့ Paraskevidekatriaphobia ရနေသူတွေလို့ ခေါ်ပါသတဲ့။
၁၁။ ထိုင်းနိုင်ငံရဲ့ နှစ်သစ်ကူးနေ့ဟာ ဧပြီလ ၁၃ ရက်နေ့ဖြစ်ပြီး အတိတ်နိမိတ်ဆိုးတွေကို ဆေးကြောတဲ့အနေနဲ့ အဲ့ဒီနေ့မှာ အချင်းချင်း ရေပက်ဖြန်းလေ့ရှိပါတယ်။ 

၁၂။ ၁၃ ဂဏန်းကို unlucky number အဖြစ် သတ်မှတ်တဲ့အထဲမှာ အထင်ရှားဆုံးအချက်တစ်ခုကတော့ ကမ္ဘာပေါ်မှာ နာမည်ကြီးဖြစ်တဲ့ မိုက်ခရိုဆော့ဖ် ( Microsoft ) ကုမ္ပဏီပါပဲ။ Version 12 ကနေ နောက်အသစ်ထွက်လာတော့ Version 14 ဖြစ်သွားပြီး Version 13 ကို ထုတ်လုပ်ခြင်း မရှိခဲ့ပါဘူး။

၁၃။ အများစုကြောက်ကြတဲ့ Friday 13th ဆိုတာကြီးက တစ်နှစ်မှာ သုံးကြိမ်ထိသာ အများဆုံးဖြစ်လေ့ရှိပြီး နှစ်အတော်များများမှာတော့ တစ်ကြိမ်၊ နှစ်ကြိမ် စသဖြင့်သာ ဖြစ်ပေါ်လေ့ရှိပါတယ်။ အနီးဆုံးဖြစ်ခဲ့တာကတော့ ၂၀၁၅ ခုနှစ်ပါပဲ၊ ၁၃ ရက် သောကြာနေ့ဟာ သုံးကြိမ်ထိ ရှိခဲ့ပါတယ်။ ( စကားစပ်လို့ဆိုရင်တော့ ၂၀၁၅ ဟာ ၈ ဂဏန်းကျတဲ့နှစ်ဖြစ်ပြီး ၁၃၊ ၄ နဲ့ ၈ ဂဏန်းတို့ဟာ ဆက်စပ်မှုရှိနေပါတယ် ) ၁၃ ရက်၊ သောကြာနေ့ အများဆုံးဖြစ်ပေါ်မယ့် နှစ်ကတော့ လာမယ့် ၂၀၂၆ ခုနှစ်ပါပဲ။

၁၃ ဂဏန်း ထပ်တလဲလဲကျရောက်ခြင်းနဲ့ ပတ်သက်ပြီးတော့ အသိပေးစာတစ်ခုကို ကြည့်လိုက်ရအောင်။ [ ဒီစာကို ‘လေ့လာသူတစ်ဦး’ အမည်နဲ့ ရေးသားပြုစုထားတဲ့ ‘ကိုရို၏ ကိန်းဂဏန်းများက ဖော်ပြသော အဓိပ္ပါယ်များ’ ဆိုတဲ့စာအုပ်မှာ စာချစ်သူများ လေ့လာဖတ်ရှုနိုင်ဖို့ ပြန်လည်ဖော်ပြလိုက်ခြင်းပဲ ဖြစ်ပါတယ်။ ]

ဆရာခင်ဗျား …

ကျွန်တော်က ၁၃ ဂဏန်းသမားတစ်ယောက်ဖြစ်ပါတယ်။ ကျွန်တော့်ရဲ့မွေးနေ့က 13th, 1840 ဇန်နဝါရီလမှာပါ။ ကျွန်တော့်ရဲ့ မွေးနှစ်ကို ပေါင်းလိုက်တာ ၁၃ ဂဏန်းရနေပါတယ်။ ကျွန်တော့်ရဲ့ ဝင်ငွေစရတဲ့နေ့ဟာလည်း ၁၃ ရက်နေ့ပါ။ ကျွန်တော် အသက် ၂၆ နှစ် ( ၁၃ နှစ်၊ နှစ်ဆကာလ ) နဲ့ ဇန်နဝါရီ ၂၆ ရက် ( ၁၃ ရက်နှစ်ဆ ) မှာ နိုင်ငံရေးခရီးကို စတင်ခဲ့ပါတယ်။ 

ကျွန်တော်ဟာ မြို့ရဲ့ MP တစ်ယောက်အဖြစ် အရွေးမခံရခင်မှာ ဆန်းဒါးလင်းမြို့ကောင်စီမှာ ၁၃ နှစ်လောက် အမှုထမ်းခဲ့ပါတယ်။ ကျွန်တော်ဟာ ပထမအိမ်ထောင်နဲ့ ၁၃ နှစ်ကြာ ပေါင်းသင်းခဲ့တယ်။ အဲ့ဒီ ပထမအိမ်ထောင်ဘက်ဇနီးက ၂၆ ရက် ( ၁၃ နှစ်ဆ ) မှာ ကွယ်လွန်သွားခဲ့တယ်။ 

ကျွန်တော်ဟာ ဒါဟမ်းကောင်တီ ကောင်စီရဲ့ဥက္ကဋ္ဌ ၁၀ ဦးထဲမှာ ပါဝင်ပြီး ဆန်းဒါးလင်းရဲ့ မြို့တော်ဝန်အဖြစ် သုံးနှစ်ကြာ အမှုထမ်းခဲ့ပါတယ်။ ကျွန်တော် အသက် ၅၈ နှစ် ( ပေါင်းခြင်း ၁၃ ရတဲ့အသက် ) ၁၈၉၈ ( ၁၃ ဂဏန်းနှစ်ဆရတဲ့ ၂၆ ဂဏန်းဖြစ်တဲ့ ခုနှစ် ) မှာ ဒုတိယအိမ်ထောင် ထူခဲ့ပါတယ်။ ဒုတိယမြောက်အိမ်ထောင်ဘက် အမျိုးသမီးက ၁၃ ရက်နေ့မှာ မွေးပြီး ကာလအတော်ကြာနောက်ပိုင်း ၁၃ ရက်နေ့မှာ ကွယ်လွန်ခဲ့ပါတယ်။

ကျွန်တော်ဟာ နောက်ပိုင်းမှာ လစ်ဘရယ်ပါတီအတွက် ၃၉ နှစ်ကြာ ( ၁၃ - ၃ ဆကြာနှစ် ) လှုပ်ရှားဆောင်ရွက်ခဲ့ပါတယ်။ ၁၉၀၃ ခုနှစ် ( ၁၃ ဂဏန်းရတဲ့နှစ် ) မှာ Tariff Reform ရွေးကောက်ပွဲအတွက် ကျွန်တော်ဝင်ပြီး အရွေးခံခဲ့ပါတယ်။ ကျွန်တော် ထောက်ခံမဲအရေအတွက် ၁၂,၃၃၄ ( ၁၃ ဂဏန်းရသော မဲအရေအတွက် ) နဲ့ အနိုင်ရခဲ့ပါတယ်။ 

ကျွန်တော့်ဘဝတစ်သက်တာခရီးကို ပြန်လည်ဆန်းစစ်ရင် ၁၃ ဂဏန်းတွေ ထပ်တလဲလဲကျရောက်နေတာကို သိသိသာသာ တွေ့ရပါတယ်။ ထပ်တလဲလဲကျရောက်တဲ့ ၁၃ ဂဏန်းတွေမှာ အစပိုင်းက ၁၃၊ နောက်တော့ ၁၃ ဂဏန်းနှစ်ဆ၊ ၁၃ ဂဏန်းသုံးဆ ဖြစ်နေတာ၊ နှစ်တွေကိုပေါင်းလို့ ၁၃ ရတာတွေဟာ ခဏခဏဖြစ်နေခဲ့ပါတယ်။ ကျွန်တော့်အတွက်တော့ ၁၃ ဂဏန်းဟာ အဆိုးတွေချည်းပဲသက်သက် မဟုတ်သလို အကောင်းတွေဖြစ်ခဲ့တာကလည်း အထင်အရှား အောင်မြင်မှုတွေပါပဲ။ ဒီတော့ ၁၃ ဂဏန်းရဲ့ ကောင်းကျိုးတွေကို ရယူပိုင်ဆိုင်ချင်တယ်ဆိုရင် ၁၃ ဂဏန်းရဲ့ ဆိုးကျိုးတွေအပေါ်လည်း ခံနိုင်ရည်ရှိရှိ ရင်ဆိုင်သင့်တယ်လို့ ခံယူထားပါတယ်ဆရာ။ 

သင့်ရဲ့
ဆင်မြူရယ်စတိုရီ … ။

( ၁၃ ) ဂဏန်းဟာ လျှို့ဝှက်တယ်၊ နက်နဲတယ်၊ အနုတ်သဘောဆောင်တဲ့ လက္ခဏာ မကောင်းတဲ့ကိန်းဂဏန်းအဖြစ် လူတွေ သတ်မှတ်ပြီး စိုးရွံ့ထိတ်လန့်ကြတယ်ဆိုတာကို စာချစ်သူတို့လည်း သိပြီးဖြစ်ပါတယ်။ တစ်ဖက်မှာလည်း ( ၁၃ ) ဂဏန်းဟာ စွမ်းအားကြီးတယ်၊ ကြီးကျယ်ခမ်းနားတယ်၊ ဆန်းကြယ်ပြီး အသိရခက်သလို နားလည်သဘောပေါက်ရင်လည်း သိပ်ကို အသုံးချလို့ကောင်းတဲ့ ကိန်းဂဏန်းအဖြစ် ရှိနေပြန်ပါရော။ မြန်မာလူမျိုးတွေမှာလည်း အများစုဟာ ဒီ ကိန်းဂဏန်းကို ကြောက်ရွံတတ်ကြ စိုးရိမ်တတ်ကြရှိတာကို တွေ့ဖူးကြမှာပါ။ ( ၁၃ ) ဂဏန်းကို မကောင်းဘူးလို့ ပြောတဲ့သူတွေလည်းရှိသလို ကြိုက်နှစ်သက်စွာ သုံးစွဲနေတဲ့သူတွေလည်း ရှိကြပါတယ်။ 

၁။ Wilt Chamberlain, Alex Rodriguez, Pavel Datsyuk … စတဲ့ နာမည်ကြီး အားကစားသမားတွေကတော့ နံပါတ် ( ၁၃ ) ဝတ်စုံကို ဝတ်ဆင်ထားခြင်းအားဖြင့် ကံကောင်းခြင်းတွေ ယူဆောင်လာပေးနိုင်တယ်လို့ ယုံကြည်ကြပါတယ်။ 

၂။ အီတလီနိုင်ငံမှာတော့ ( ၁၃ ) ကိန်းဂဏန်းဟာ သိပ်ကိုကံကောင်းစေတဲ့ ဂဏန်းအဖြစ် ယုံကြည်သုံးစွဲကြပါတယ်။ 

၃။ ( ၁၃ ) ဂဏန်းဟာ သင်္ချာမှာ အရေးပါတဲ့ သုဒ္ဓကိန်းလည်းဖြစ်ပြန်တယ်။ 

၎။ ၅၂ - ချပ် ဖဲထုပ်တစ်ထုပ်မှာ ( ၁၃ ) ကတ်စီပါတဲ့ တူညီတဲ့အုပ်စုလေးခုရှိပါတယ်။ 

၅။ Friday 13th ဖြစ်ဖို့ဆိုရင် အဲ့ဒီလဟာ လူတိုင်းလိုလိုနှစ်သက်ကြတဲ့ တနင်္ဂနွေရက်နဲ့စတဲ့လ ဖြစ်ရပါတယ်။ 

၆။ ရှေးဟောင်းဂန္ဓာရီအဖွဲ့အစည်းတွေမှာ အဖွဲ့ခွဲငယ်တွေကို လူ ၁၃ ဦးဖြင့်သာ ဖွဲ့စည်းလေ့ရှိပြီး အဲ့ဒီဖွဲ့စည်းတာဟာ ပြန်ပရန်သူ အလွယ်တကူ မထိုးဖောက်နိုင်ဘဲ အဖွဲ့ဟာ စည်းစည်းလုံးလုံး ကျစ်ကျစ်လစ်လစ်ရှိစေတယ်လို့ ဆိုပါတယ်။

၇။ နာမည်ကြီးအချက်တစ်ခုကတော့ ၁၃ ရက်နေ့မှာမွေးတဲ့ နာမည်ကြီးအဆိုတော်တစ်ဦး၊ Friday 13th ကျတဲ့ရက်မှာ အသက် ၁၃ နှစ်ပြည့်တယ်၊ သူမရဲ့ ပထမဆုံး album ၁၃ ပတ်ကြာအောင် စာရင်း ထိပ်ဆုံးမှာရှိနေခဲ့တယ်၊ သူမရဲ့ ပထမဆုံးသီချင်းရဲ့ into က ၁၃ စက္ကန့်ပဲကြာတယ်၊ သူမကတော့ နာမည်ကြီးအဆိုတော် Talyor Swift ပါပဲ။ သူမ ဆုယူတဲ့အခါ သူမထိုင်တဲ့ထိုင်ခုံက 13th row, 13th seat, 13th section မှာရှိနေတယ်။ သူမကတော့ ( ၁၃ ) ဂဏန်းဟာ သူမအတွက် LUCKY နံပါတ်ပါပဲတဲ့။ 

ဒီတော့ ကျွန်တော်တို့အများစုဟာ ( ၁၃ ) ဂဏန်းကို စိုးရွံ့ကြတယ်။ ခုလိုမျိုး အချက်အလက်တွေကို တစ်ဆင့်စကား တစ်ဆင့်နားနဲ့ ကြားသိရပြီး ထိတ်လန့်ကြတယ်။ ဒီဂဏန်းကို သတိပြုမိတဲ့အချက်တွေကတော့ ဂဏန်းဗေဒင်ပညာရပ်ဆိုင်ရာ စာအုပ်တွေနဲ့ နိုင်ငံခြားရုပ်ရှင်တွေပဲလို့ မြင်မိပါတယ်။ ဂဏန်းဗေဒင်စာအုပ်ဆိုတာ ပညာရပ်ကို တကယ်လေ့လာသူကလွဲလို့ ကျန်သူတွေက အပျင်းပြေ ဟိုတွက်ဒီတွက်လုပ်ရင်း ကိုယ်အကြောင်း ဟောပြောချက်လေးတွေကို အပျော်ဖတ်ဖို့ သက်သက်ပဲဖြစ်ပါတယ်။  ကိန်းဂဏန်းတွေအကြောင်း ကောင်းကျိုးဆိုးကျိုးတွေကို ဖတ်ရှုရတဲ့အခါမှာ ( ၁၃ ) ဂဏန်းကို အာရုံစိုက်မိပြန်ပါရော … ပြီးတော့ နိုင်ငံခြားသရဲကားတွေမှာ ( ၁၃ ) ဂဏန်းက ဇာတ်လိုက်ဖြစ်နေပြန်သေးတယ်၊ ဒီ့အပြင် လူတွေကြားထဲမှာလည်း ( ၁၃ ) ကို လူဆိုးကြီးတစ်ယောက်အဖြစ် ပုံဖော်ပြောဆိုနေတာတွေ အများအပြားရှိနေတော့ “၁၃ ဂဏန်းမကောင်းဘူး” ဆိုတဲ့ အတွေးအမြင်က ကျွန်တော်တို့ ဦးနှောက်ထဲမှာရော ကိုယ်ပိုင်အသိထဲမှာပါ အလိုလိုစွဲနေတော့တာပါပဲ။ ဦးနှောက်ထဲမှာစွဲသွားတယ်ဆိုတာ ပတ်ဝန်းကျင်ရဲ့ ရိုက်ခတ်မှုကြောင့်လို့ ခုခံပြောဆိုလို့ရပေမဲ့ ပင်ကိုအသိမှာပါ စွဲနေတယ်ဆိုရင်တော့ ဒါကို သေချာဆန်းစစ်သင့်ပါတယ်။ ဆင်ခြင်တုံတရားရှိတဲ့ လူသားတွေဖြစ်တာမို့ အကြောင်းဖြစ်ရပ်တစ်ခုကို စဉ်းစားဆင်ခြင်ခြင်း၊ လေ့လာသုံးသပ်ခြင်းမရှိဘဲ မျက်စိစုံမှိတ် ခေါင်းညိတ်လုပ်လိုက်မယ်ဆိုရင် ကိုယ်ညံ့ရာကျသွားတော့မှာပါ။
 
ဒါကြောင့် ( ၁၃ ) ဂဏန်းနဲ့ ပတ်သက်ပြီး အစွဲရှိနေတယ်ဆိုရင် ဒီအစွဲကို အခြေအမြစ်ကစလို့ ပြန်လည်ဆန်းစစ်ပြီး ကိုယ့်ရဲ့ သတ်မှတ်ယူဆချက်က အကျိုးအကြောင်း ခိုင်လုံခြင်းရှိမရှိကို သေချာလေ့လာဖို့ လိုပါလိမ့်မယ်။ တကယ်ပဲ ကိုယ်ဟာ ( ၁၃ ) ဂဏန်းနဲ့ တစ်စုံတရာ ကျိုးကြောင်းဆက်နွယ်မှုရှိနေတယ်ဆိုရင်တော့ ကိန်းဂဏန်းတွေအကြောင်း သေချာလေ့လာသင့်ပြီး ကိုယ့်ရဲ့ ဘဝလမ်းကြောင်းမှာ ထိခိုက်ခြင်းမရှိအောင် ဆောင်ရွက်သင့်တာတော့ အမှန်ပါပဲ။ 

( ၁၃ ) ရက်နေ့မှာမွေးသူ celebrities တွေဖြစ်တဲ့ Mary-Kate, Ashley Olsen, Julia Louis Dreyfus, Steve Buscemi, Max Weinberg နဲ့ Peter Tork , Tupac Shakur … စသူတို့ကတော့ ၁၉၉၆ ခုနှစ်၊ စက်တင်ဘာလ ၁၃ ရက်နေ့မှာ သေဆုံးကြတယ်လို့ CNN သတင်းတစ်ခုမှာ ဖော်ပြခဲ့ဖူးပါတယ်။ 

ကမ္ဘာကျော်အမေရိကန်စာရေးဆရာကြီး မာ့ခ်တွိန်းတောင် ၁၃ ဂဏန်းနဲ့ပတ်သက်ပြီး ရယ်ရမလို ငိုရမလိုဖြစ်ရပ်တစ်ခုနဲ့ ကြုံဖူးတယ်။ တစ်ရက်မှာတော့ သူဟာ ညစာစားပွဲကိုလာရောက်ဖို့ ၁၃ ယောက်မြောက်ဧည့်သည်အဖြစ် ဖိတ်ကြားခြင်းခံရတယ်။ ရှေးရိုးစွဲသူငယ်ချင်းတစ်ယောက်က မသွားဖို့ တားခဲ့ဖူးပေမယ့် မာ့ခ်တွိုင်းကတော့ သွားခဲ့တာပေ့ါ။ ဒါပေမဲ့ သူပြန်လာတော့ ခုလိုရင်ဖွင့်တယ်။ ကျွန်တော် ကံမကောင်းဘူးဗျာ တဲ့။ ဘာလို့လဲဆိုတော့ ညာစာစားပွဲကို သူရောက်သွားပေမဲ့ ဟိုက အစားအသောက်ကို ၁၂ ယောက်စာပဲရှိတာ စီစဉ်ထားလို့တဲ့လေ။ 

ကဲ … စာဖတ်သူတို့ရော 13 နဲ့ ပတ်သက်ပြီး ဘာတွေကြုံတွေ့ဖူးလဲ၊ မန့်ထဲမှာ ပြောပြသွားပါဦးဗျာ။ 
.............
Ref; mentalfloss.com / mysticalnumbers.com / mysticurious.com 
............
"ဒီပို့စ်လေးကို ဖတ်ရှုပြီး စိတ်ဝင်စားတယ်ဆိုရင် Like နဲ့ Share လုပ်၍ ဝန်ဇင်းကို အားပေးခဲ့ကြဖို့ မမေ့နဲ့နေ်ာ" "စာချစ်သူများ ကြုံတွေ့ဖူးတဲ့ ၁၃ ဂဏန်းနဲ့ ပတ်သက်တဲ့ အဖြစ်အပျက်များရှိရင် Comment Box ထဲမှာ ရေးသားမျှဝေခဲ့ပါဦး"

ဝန်ဇင်းပရိသတ်ကြီးကို မေတ္တာများစွာဖြင့် ချစ်ခင်လျက်။ 

Related Posts